నిడదవోలు కోట సత్తెమ్మ తల్లి దర్శన భాగ్యం, పశ్చిమ గోదావరి జిల్లా, ఆంధ్ర ప్రదేశ్

     కోట సత్తెమ్మ తల్లి ఆలయంలోకి అడుగు పెడదామనుకొన్నంతలోనే ఎదురుగా నిర్మాణంలో వున్న 9 గదుల రాజ గోపురం దర్శనమిస్తుంది. గోపురం పక్క నుంచి ఆలయంలోకి ప్రవేశించటానికి ధ్వజ స్తంభం దగ్గర నుంచుంటే, కుడి ప్రక్క కాళ్ళు కడుగుకోవటానికి పంపులు కనిపిస్తాయి. అక్కడ కాళ్ళు కడుక్కుని ధ్వజ స్తంభం దగ్గర మ్రొక్కి లోపలకి ప్రవేశించాలి అని అనుకునేలోపుగానే ఒక 9 అడుగుల నల్లరాతి విగ్రహం చాళుక్యుల కాలంనాటిది అదే అమ్మవారు ఎదురుగా ప్రసన్న వదనంతో దర్శనమిస్తారు.  1936 వ సంవత్సరంలో తిమ్మరాజు పాలెం అగ్రహారీకులైన దేవులపల్లి రామ్మూర్తి శాస్త్రి గారి పొలంలో ఆయన పొలం దున్నుతుండగా నాగటి చాలుకి తగిలి బయటపడింది (సీతమ్మ తల్లి ?) అని ఆలయ సైట్ లో పొందుపరిచారు. అమ్మవారి విగ్రహం చూసి ఇంత పెద్ద విగ్రహం చూస్తుంటే మావులమ్మ అమ్మవారు, భీమవరం గుర్తుకు వస్తున్నారు. ఇంత పెద్ద రూపాలు చాలా అరుదు అని స్నేహితుడు మాటల సందర్భంగా చెప్పాడు. 

లక్షలాది భక్తులు ఇక్కడ అమ్మవారిని దర్శించుకోవటమే కాదు సంతాన భాగ్యాన్ని కలిగించే అమ్మగా కూడా కొలుస్తారు. ఇక్కడ నైరుతి మూలన వున్న సంతాన వృక్షమే అందుకు సాక్ష్యం. ఇక్కడ క్షేత్ర పాలకుడు పంచముఖ ఆంజనేయ స్వామి. విఘ్నేశ్వరుడు, మేధా దక్షిణామూర్తి, రాజ రాజేశ్వరి అమ్మవారు, కృష్ణుడి విగ్రహాలు కూడా ఇక్కడ చూడవచ్చు. ఇక్కడ ఉచిత ప్రసాద వితరణ చేస్తారు. భక్తులు ఉండటానికి రూములు సదుపాయం కూడా వున్నాయి. దేవాదాయ శాఖ అధీనంలో వుంది. (నేను తల్లి గారి సంవత్సరీకం ఒకరోజు ముందు ఆలయానికి వెళ్ళటం తటస్థించింది. అందుకని ఇంకా సంవత్సరీకం పూర్తికాలేదు అని యథావిధిగా కుటుంబ పురోహితాదేశానుసారం ధ్వజస్తంభం దగ్గరనుంచి దర్శనం చేసుకున్నాను). 

అమ్మవారి ఆలయ వివరాలు, చరిత్ర, ఉత్సవాలు, సంతానార్ధులు పాటించవలసిన విధి విధానం, ఇతర వివరాలు అంతర్జాలపు లంకెలలో అత్యద్భుతంగా వివరించారు. అందుకని తలా,తోకా లేకుండా రాసిన నా రాతల అశక్తతను మన్నించి క్రింద లంకెలు చూడగలరు :).


ఆలయం వారి సైట్


అంతర్జాతీయ తెలుగు వార్తా వేదిక వారిది


వికిపీడియా


ఆలయ రాజ గోపురం నిర్మాణ విషయమై అకౌంటెంట్ వారు అనుకుంట, వారి  కార్యాలయంలో కలిసి మాట్లాడాము. ఆయన అకౌంట్ వివరాలు ఇచ్చారు. ఎవరైనా ఆసక్తి వున్న దాతలు ఈ కార్యం నిమిత్తం పాటు పడాలి అనుకుంటే మీ మీ మొత్తాలను ఆన్లైన్ లో వారికి పంపవచ్చు కాకుంటే తప్పని సరిగా వారి నెంబర్ కి ఒక మెసేజ్ / కాల్ చెయ్యండి. అప్పుడు బ్యాంకు మొత్తానికి, వారి అకౌంట్ కి మొత్తాలు తేడా రావు అని చెప్పారు. అందుకని మొత్తం వేసాక ఒక మెసేజ్ / కాల్ చెయ్యగలరు.

ఫొటోస్ లలో అకౌంట్ డీటెయిల్స్ పెట్టాను చూడగలరు. దేవాలయ నిర్మాణం వంటి వాటిలో పాలు పంచుకోవటం, తద్వారా గడించే పుణ్యం వంటి విషయాలను వర్ణించలేము. భావనా మాత్రం చేతనే జీవితాలు ధన్యం అవుతాయి అని మాత్రం నిస్సందేహంగా చెప్పగలను. వుంటాను. 

పాపి (పాపిట) కొండల యాత్ర - గోదావరి జిల్లాలు, ఆంధ్ర ప్రదేశ్

శ్రీ చాగంటి కోటేశ్వరరావు గారు ఒక ప్రవచనం లో భాగంగా చెప్పారు. అవి పాపిట కొండలు గాని పాపి కొండలు కావు. స్త్రీల నుదురు భాగంలో తల మొదటగా పాపిడి  (పాపిట) భాగంలో తన సౌభాగ్యం చల్లగా ఉండాలి అని కుంకుమ ధరిస్తారు కదా ఆలా పాపిట భాగం తలను రెండుభాగాలుగా వేరు చేస్తుంది. అలాగే పాపిట కొండల దగ్గర గోదావరి తూర్పు, పశ్చిమ భాగాలుగా రెండుగా వేరు అవుతుంది అందుకే ఇటు పక్కన వున్నది పశ్చిమ గోదావరి జిల్లా అటు పక్కది తూర్పు గోదావరి జిల్లా అని అంటుంటారు. నేను భౌగోళికంగా కొంచెం బలహీనుడిని కాబట్టి సరిహద్దులు విషయమై క్షమార్హుడిని :).

ఎప్పటినుంచో గోదావరి వాసులు అని పిలిపించుకోవటమే కానీ ఎప్పుడూ గోదావరిని సరిగా చూసింది లేదు (కాలేజీ రోజుల్లో పడవ మిస్ అయ్యి పది కిలోమీటర్ల సాహస యాత్ర చేసి కొరుటూరులో చక్కని ఆంధ్ర భోజనం చేయటం తప్ప ). అంతెందుకు పక్క జిల్లాలో శక్తిపీఠాలు వున్నా జిల్లా దాటే బయటకు పోయే వరకూ నాకే శక్తి పీఠాల దర్శన భాగ్యం  కలగలేదు. ఇక వేరేవారి సంగతి ఎందుకు లెండి.

సరే మనం యాత్ర విషయానికి వచ్చేద్దాం. ఎక్కడెక్కడ నుంచి పాపిట కొండలు అంటూ, గోదావరి యాత్రలకు వస్తుంది ప్రజానీకం. పశ్చిమ గోదావరి లో పుట్టి పెరిగి గోదావరి అలల సొగసు చూడలేకపోయామే అని ఈ మధ్య కొంచెం ఫీలింగ్ మొదలయింది. పోలవరం ప్రాజెక్ట్ పుణ్యమా అని ఇంక పేరాంటాల పల్లి యాత్రలు వుండవు అనటం మరొక కారణం. మొత్తానికి ఒక నలుగురు స్నేహితులతో కలిసి రాజు వెడలె పరివారం వెడలె అన్నట్టు బయలుదేరితిమి.

ఏపీ టూరిజం వాళ్ళ సైట్ లో బుక్ చేసుకుందామని విశ్వప్రయత్నం చేసి విఫలమయ్యి కస్టమర్ కేర్ వాళ్ళతో మాట్లాడి సరాసరి రాజమండ్రి కేంద్రానికి పొమ్మంటే చేసేది లేక గుమస్తాని నమ్మి ఆయన అకౌంట్ లో మనీ వేసి మొత్తానికి టికెట్స్ సంపాదించుకున్నాము. రసీదులు గురించి అడగవద్దు (ఇస్తామన్నారు గాని మొత్తానికి ఇవ్వలేదు లేదా మళ్ళీ మేము అడగటం కుదరలేదు అనుకోండి ఎందుకొచ్చిన గొడవ).

అస్సలు పాపిట కొండల యాత్రకు బయలుదేరటానికి మరొక కారణం - విహార యాత్రని కాదు కాని మధ్యలో గండి పోచమ్మ తల్లి ఆలయం, పేరంటాల పల్లి ఆలయం & రామ కృష్ణ ఆశ్రమం ఇవి కూడా ఉండటంతో కాస్త ప్రేరణ కలిగింది.

ఒకరోజు / రెండు రోజుల యాత్రల లాగ ప్యాకేజీలు అందుబాటులో వున్నాయి. ఏ.పి. టూరిజం వాళ్ళతో పాటు ప్రయివేట్ టూరిజం వాళ్ళ ప్యాకేజీలు కూడా వున్నాయి. మేము కాస్త భద్రత ఎక్కువ ఉంటుంది వినోదం తక్కువైనా అని ఏ.పి. టూరిజం వాళ్ళది బుక్ చేసుకున్నాము.

మాములుగా రాజమండ్రి నుంచి బస్సు లో పోలవరం పట్టిసీమ రేవు దగ్గరికి తీసుకొస్తారు. కాకపోతే మాకు పోలవరం దగ్గరే కాబట్టి బైక్స్ మీద సరాసరి వచ్చేసాము. తొమ్మిది గంటల సుమారులో లాంచీ బయలుదేరింది. ఇద్దరు బి.టెక్ కుర్రాళ్ళు శని, ఆదివారాల్లో వినోదం పేరిట బానే ఈవెంట్స్ ఆర్గనైజ్ చేసుకుంటూ పార్ట్ టైం జాబ్ లాగా చేసుకుంటున్నారు. పాపం ఆ బీ.టెక్ స్టూడెంట్సే ఈ విషయాలన్నీ చెప్పింది. యాత్ర, దర్శనం & వినోదం అన్నీ మొత్తానికి ఓ.కే.

పేరాంటాల పల్లి అమ్మవారి ఆలయం, వేడి వేడి భోజనం, ఆహ్లాద పరిచే ప్రకృతి, గోదావరి తీరా ప్రాంతాలు, అల్లూరి సీతారామ రాజు గారు దాడి చేసిన పోలీస్ స్టేషన్, ఆపద్భాంధవుడులో చిరంజీవి మట్టితో శివుడిని చేసే సన్నివేశ ప్రదేశం, తేనీటితో కూడిన గోదావరి అల్పాహారం, మెలికలు తిరుగుతూ పాపిట కొండల గోదావరి ప్రావాహాన్ని ఆపేసినవా అన్నట్టు కనిపించే లొకేషన్, ఇంకా భూమి మీద డబ్బు గాలి సోకని పచ్చని ఊర్లు అన్నట్టు వస్తు మారక వినిమయం జరిగే ఊరు, పేరాంటాల పల్లి ఆలయం, ఆశ్రమం - వాహ్ ! ఒక్కసారి అయినా వెళ్లి రండి చెప్పే అనుభూతి కాదు.  

కొసమెరుపు ఏమిటి అంటే లాంచీలు ఆగే చోట అంటే గోదావరి తీరప్రాంతం చాలా లోతుగా ఊబి లాగ వుంది. నేను కాళ్ళు కడుగుకుందామని ఒక రెండు అడుగులు వేసానో లేదో మోకాలు వరకు దిగిపోయాను. చావు వరకు వెళ్లి బతికి బయటపడ్డ ఫీలింగ్. జలగండం అంటే ఇదే కాబోలు. ఇంకా చూడవలసిన టెంపుల్ ఉన్నట్టు వున్నాయి మన ఖాతాలో :P. నెక్స్ట్ మంత్ వెళ్లబోయే తిరుచెందూర్ అయినా కావచ్చు :).

 అల్లూరి వారి మొదటి పంజా పడిన పోలీస్ స్టేషన్ ఇదే. కొత్తది కూడా పక్కనే కట్టారు చూడండి.

పేరంటాల పల్లి శివాలయం & రామకృష్ణ పరమహంస ఆశ్రమం

ఈ చెట్టు చాలా సినిమాల్లో వుంది ముఖ్యంగా పల్లెటూరి వాతావరణం అందునా గోదావరి ప్రాంత నేపథ్యంలో  తెరకెక్కిన సినిమాలలో (వంశీ గారి సినిమాలు అనుకోండి) గమనించండి.

గండి పోచమ్మ తల్లి ఆలయం

'పాపిట' కొండలు :)